Inicio > Actualidad > ¿Alerxes, o COVID-19? Enseñémoste a destremales
ActualidadAsturiasTu salud

¿Alerxes, o COVID-19? Enseñémoste a destremales

Los síntomes de les alerxes estacionales pueden asemeyase a los del andanciu del coronavirus. En SALÚdable enseñémoste cómo destremales y cómo pidir ayuda si te fai falta.

Pa la xente con alerxes estacionales, la primavera trae consigo espirríos, un pocu de pipe pa la ñarra, picor de güeyos, tose… Pero esti añu los síntomes pueden confundise colos del COVID-19. ¿Cómo saber cuándo ye una cosa, y cuándo otra?

A midía que los árboles y les plantes suelten el polen esti añu, crez la nuesa inquietú por saber si lo que nos ta pasando ye alerxa o daqué cosa peor.

Cola xubida les temperatures, multiplíquense los alérxenos (como’l polen) y los síntomes desendolquen de sópitu. Tol mundiu tien la sensibilidá sanitario al llímite pola pandemia, tal que cuando tusemos, yá hai cares de llercia. Por eso ye especialmente importante que veamos les coses con perspeutiva.

Entender los síntomes

El mayor indicativu de COVID-19 ye la fiebre, que nun suel dase n’alerxes estacionales. Non tola xente infeutao pol coronavirus tien fiebre, pero sí una gran mayoría. Asina, considérase un síntoma principal, xuntu cola tose seco (‘seco’ porque nun tien moco o flema) y el cansancio; nos casos más graves, tamién hai problemas respiratorios.

Anque a delles persones con COVID-19 yos pingue la ñarra, ye un síntoma pocu frecuente qu’amás ye, xuntu colos güeyos enritaos y el picos en ñarra y gargüelu, más típicu de les alerxes estacionales.

Los alérxicos pueden cursar con tose pero, al contrariu que la tose seco del coronavirus, esta ye frutu de la mucosidá de la alerxa (ye decir, cuando los mocos ‘baxen’ al fondu’l gargüelu).

Una forma de destremar si tenemos alerxa o COVID-19 ye tomar pastilles pa la alerxa o tener pricuru col polen y pesllar les ventanes. Si con esto sintimos una meyora, ye mui probable que sólo tengamos alerxa.

Eso sí, curiáu: los síntomes de l’alerxa pueden facer que nos toquemos más la cara (pa sonanos, pa sobar los güeyos…) y d’esa mena tamos más espuestos a la infección por xérmenes y virus. Por eso, en SALÚdable recomendemos que llaves les manes davezu y qu’uses pañuelos d’un solu usu.

Podría ser el gripe

Nun escaezas que’l maltar tamién puede ser pol gripe. El coronavirus lleva tola atención agora mesmo, y con bon motivu, pero tovía nun acabó la temporada del gripe. Y dambes enfermedaes comparten muchos síntomes, asina como los espirríos y la conxestión nasal de les alerxes y del catarru.

Los centros sanitarios siguen rexistrando un númberu altu de casos de gripe, asina que nun lo descartes del too.

Dir al mélicu seguros

Si tienes síntomes pero quieres dir al mélicu pa tar ciertu, les autoridades sanitaries recomienden el siguiente procedimientu: llama al centru de salú, pidi que’l to mélicu te llame y, cuandu lo faiga, descríbi-y los tos síntomes. Asina podrán derivate al sitiu correchu o te pidirán que quedes en casa y tomes la melicación y si nun meyores, que tornes a llamar.

D’esta forma, prevenimos que’l virus s’extienda y los sanitarios tienen mayor marxe pa preparar les consultes. Sicasí, si tienes síntomes o problemas graves, como problemas pa respirar, llama al 112 y dí-yos que los tos síntomes correspuenden col COVID-19.

¿Puedo acudir al alergólogu?

A cuenta del estáu d’alarma y de les recomendaciones sanitaries en casu de COVID-19, los pacientes con alerxes estacionales agudes puede que sientan que nun tienen drechu a pidir ayuda pa meyorar los sos síntomes.

Por suerte, nun ye’l casu. Les consultes col to mélicu van a camudar cola pandemia, gracias al avance de la telemelecina. La telemelecina tá mui estendío y son munchos los que faen usu d’ello. Dende lluéu, nun equival del too a una consulta presencial, pero’l to doutor puede ‘vete’ y recetate lo que faiga falta.

Si necesites que te pongan inyeiciones, tendrás de dir al centru salú. Nesi casu, convién que pidas cita con marxe, pa evitar por exemplu que te topes con muncha xente na salina d’espera. Tolos que tengan de siguir un tratamiento d’esposición a los alérxenos tendrán d’esperar fasta que llevanten l’estáu d’alarma.

Controla los síntomes pa controlar la enfermedá

Hai munches estratexes pa llevar la alerxa, aparte de consultar al mélicu.

Por exemplu, podemos facer un diariu de la alerxa, onde apuntar síntomes, posibles detonantes y detalles alrodiu d’ellos: si les ventanes taben abiertes o non, cuándo entamaron los síntomes, cuándo empeoraror y cuántu duraron, el tiempu que facía, lo que comieres, cómo durmieres, lo que tardó la melicación en facer efeutu…

Quiciabes desendolques los síntomes al salir pela tarde a facer deporte o dar un paseu (con distanciamientu social, nun lo escaezas), pero pela mañana o al meudía non. O los síntomes son más fuertes si nun duermes o si piques muncho ente hores, pero ameyoren cuando duermes les tos 8 hores y comes sano.

Na redaición somos unos cuantos los alérxicos que seguimos estes recomendaciones y, anque nun lo paeza, ayuden munchu a establecer patrones pa controlar la alerxa. ¡Asina que fai casu, que ta comprobao!

Comments

comments

(Leido 50.110 veces)

Deja una respuesta

Tu dirección de correo electrónico no será publicada. Los campos obligatorios están marcados con *